Ellefu ára stúlka er sögð vera í hópi þeirra fjögurra sem fórust í hryðjuverkaárásinni í Stokkhólmi í gær. Sænska dagblaðið Expressen hefur eftir ættingja stúlkunnar að hún hafi verið á leið heim úr skólanum þegar hún varð fyrir flutningabílnum sem árásarmaðurinn ók inn í mannfjölda við Åhléns City-verslunarmiðstöðina í miðborginni.
Expressen segir stúlkuna hafa talað við móður sína í síma skömmu áður en árásin var gerð og ætluðu þær að hittast við neðanjarðarlestina skammt frá árásarstaðnum.
Stuttu síðar ók bílinn inn í mannþröngina og skelfingin greip um sig. Mikil leit hófst hjá fjölskyldunni í kjölfarið að stúlkunni og ók hún á milli sjúkrahúsa í borginni í von um að fá fréttir af henni þar.
Sænsk yfirvöld greindu frá því í gær að fjórir hefðu farist í árásinni og 12 slasast, þar af níu alvarlega.
„Síðan kom lögregla heim til þeirra og bað um DNA-sýni og þá áttuðum við okkur á að fréttirnar yrðu líkast til slæmar,“ hefur Expressen eftir ættingjanum. Tilkynningin um að hún væri í hópi hinna látnu hafi svo komið á hádegi í dag. „Það var slæmt að þetta tæki svona langan tíma, en nú þarf móðir hennar að fá tíma til að syrgja.“
Boðað hefur verið verið til sérstakrar kærleiksstundar á Sergels-torgi á morgun í gegnum Facebook undir yfirskriftinni „Stokkhólmur stendur sameinaður!“ og hafa 23.000 manns þegar lýst yfir áhuga á að taka þátt.
Drottningargatan var opnuð á ný fyrir umferð í kvöld, þegar tæknideild lögreglunnar hafði lokið rannsókn á vettvangi.
Lögregla hefur staðið fyrir húsleit á nokkrum stöðum í dag og hafa sænskir fjölmiðlar greint frá því að þrír hið minnsta hafi verið handteknir í tengslum við rannsóknina. Lögregla hefur ekki viljað staðfesta þær fregnir en hefur þó sagt að hún telji manninn sem handtekinn var í gærkvöldi, 39 ára Úsbeka, vera árásarmanninn.