Þjóðvarðlið Venesúela réðst á blaðamenn og ljósmyndara þegar þeir hugðust greina frá og taka myndir af mótmælum gegn Nicolas Maduro forseta landsins og ríkisstjórn hans í gær. Luis Robay, ljósmyndari AFP, var einn af þeim sem hermenn beittu ofbeldi og reyndu að koma í veg fyrir að hann tæki myndir af átökum milli mótmælenda og hermanna í höfuðborginni Caracas.
„Hermennirnir keyrðu að mér á mótorhjólum og slógu mig í höfuðið nokkrum sinnum og hrintu mér og í götuna svo ég féll. Þeir lyftu mér upp á skotheldu vesti sem ég var í þar til ég missti myndavélina í jörðina,“ sagði Robay við AFP.
Robay var með gasgrímu fyrir vitum sér og reyndu hermennirnir að rífa hana af honum. Hann var handtekinn og beðinn um að hætta að taka myndir og var látinn laus eftir það. Allar eigur hans voru gerðar upptækar sem og farartækið sem hann var á.
Að minnsta kosti tveir ljósmyndarar frá öðrum fjölmiðlum hlutu einnig sömu útreið.
Mótmælin hafa stigmagnast í Venesúela undandfarna tvo mánuði. Að minnsta kosti 60 manns hafa látið lífið í mótmælunum.
Stjórnarandstaðan í Venesúela efnir til daglegra mótmælafunda þar sem þess er krafist að Maduro láti af völdum. Segir hún efnahagskreppuna í Venesúela og skort á matvælum, lyfjum og öðrum nauðsynjum vera forsetanum að kenna.
Maduro sakar stjórnarandstöðuna aftur á móti um að leggja á ráðin um valdarán gegn sér með stuðningi bandarískra stjórnvalda og segir kreppuna vera kapítalískt samsæri.