Kanadískur prestur sem hefur setið í fangelsi í Norður-Kóreu undanfarin ár hefur verið látinn laus af heilsufarsástæðum og er nú á leið til síns heima samkvæmt fregnum frá fjölskyldu hans.
Ríkisfréttastofa Norður-Kóreu greindi frá því að Hyeon Soo Lim, sem fæddist í Suður-Kóreu og er 62 árs, hafi fengið reynslulausn af mannúðarástæðum.
„Við erum fegin að heyra að Lim er loks á leiðinni heim. Þar mun hann hitta fjölskyldu sína aftur og hitta barnabarn sitt í fyrsta skipti,“ kom fram í yfirlýsingu frá Lisu Pak talsmanni fjölskyldu Lim vegna málsins. Þar kom einnig fram að fjölskyldan gæti ekki beðið eftir því að hitta Lim.
Sendinefnd á vegum kanadískra yfirvalda hafði verið send til Norður-Kóreu til að fá prestinn lausan.
Pak þakkaði kanadískum yfirvöldum sem unnu að því bak við tjöldin að fá Lim lausan. Auk þess þakkaði hún sænskum diplómötum sem aðstoðuðu við málið.
Justin Trudeau, forsætisráðherra Kanada, sagðist í yfirlýsingu vera ánægður og feginn að geta staðfest að Lim væri laus úr haldi. Hann bætti því við að presturinn yrði fljótlega umkringdur vinum og vandamönnum í Kanada.
Lim var handtekinn í Norður-Kóreu í janúar 2015 eftir að hann fór þangað frá Kína. Kirkja prestsins segir að hann hafi aðeins starfað að mannúðarmálum í Norður-Kóreu.
Lim var dæmdur í lífstíðarvistunar í þrælkunarbúðum og hefur heilsu hans hrakað mjög frá því hann hóf afplánun. Snemma á síðasta ári birtust fregnir þess efnis að Lim ynni við að grafa holur átta klukkustundir á dag, sex daga vikunnar, í aldingarði við fangabúðirnar þar sem hann dvaldi.