Boris Johnson, utanríkisráðherra Bretlands, kennir Norður-Kóreu um pattstöðuna sem komin er upp á milli Norður-Kóreu og Bandaríkjanna. Hann vill sjá diplómatíska lausn á vandamálinu. AFP fréttastofan greinir frá.
Donald Trump, forseti Bandaríkjanna, og Norður-Kórea hafa skipst á hótunum að undanförnu og skemmst er að minnast þess þegar Trump hótaði að láta rigna „eldi og brennisteini“ yfir landið. En Norður-Kórea hefur hótað eldflaugaárásum á eyjuna Gvam í Kyrrahafi þar sem Bandaríkjamenn starfrækja herstöð.
Johnson tjáði sig um málið á Twitter fyrr í dag í nokkrum tístum. „Það eru stjórnvöld í Norður-Kóreu sem bera ábyrgð á þessari stöðu og þau verða að laga hana. Alþjóðasamfélagið hefur sameinast um að sannfæra Norður-Kóreu að láta af fyrirhugðum hernaðaraðgerðum. Við erum að vinna að því með Bandaríkjamönnum og bandamönnum okkar á svæðinu að fá diplómatíska lausn í þessari deilu.“
The international community is shoulder to shoulder in ensuring North Korea stops its aggressive acts.
— Boris Johnson (@BorisJohnson) August 12, 2017
The North Korean regime is the cause of this problem and they must fix it
— Boris Johnson (@BorisJohnson) August 12, 2017
Trump hefur sagt að Bandaríkjaher sé tilbúinn að takast á við árásir Norður-Kóreu á Gvam og muni standa vörð um eyjuna.