Sprengjubeltin sem fimmmenningarnir sem spænska lögreglan felldi í bænum Cambrils í gærkvöldi klæddust reyndust ekki vera ekta. Þetta hefur spænska dagblaðið El Pais eftir katalónskum yfirvöldum.

Greint hafði verið frá því að spænska lög­regl­an hefði fellt fimm meinta hryðju­verka­menn í Cambrils, sem er um 100 km suður af Barcelona. Menn­irn­ir voru sam­an í bíl sem ók á gang­andi veg­far­end­ur með þeim af­leiðing­um að einn lést og sjö særðust, að sögn BBC, þar af einn al­var­lega. Skaut lög­regla á bíl­inn til að stöðva för hans, en einn hinna særðu er lög­reglumaður.

Spænsk­ir fjöl­miðlar segja bíl mann­anna hafa farið á hvolf, þeir hafi hins veg­ar verið fljót­ir að koma sér út og lög­regla hafi þá skotið á þá. Fjórir þeirra létust á staðnum, en einn lést á sjúkrahúsi af sárum sínum

Lög­regla hefur greint frá því að hún telji þá tengj­ast árás­inni í Barcelona fyrr um dag­inn.

Guardian segir þá sem stóðu fyrir árásinni á London Bridge og Borough-markaðinn nú í júní hafa beitt svipaðri aðferð. Allir þrír árásarmennirnir þar hafi klæðst leðurbeltum með áföstum plastflöskum sem búið var að vefja silfurlitu límbandi til að líkja eftir sprengjubelti.

Tengdar fréttir

Hryðjuverk í Barcelona

Óhapp varð mörgum til bjargar

• Skutu vopnaðan mann á lögreglustöð
• Sýna undirbúning Barcelona-árásarinnar
• Handtekinn vegna árása á Spáni
• Munir til minningar færðir á safn

» Fleiri tengdar fréttir

• Blogga um frétt