Hope Hicks hefur verið ráðin samskiptastjóri Donalds Trump, Bandaríkjaforseta. Hicks tók við stöðunni til bráðabirgða þegar forveri hennar í starfi, Anthony Scaramucci, var rekinn í júlí síðastliðnum eftir einungis 10 daga í starfi.
Frétt mbl.is: Scaramucci hættur
Hicks mun nú leiða samskiptateymi Hvíta hússins til frambúðar. Fjölmiðlafulltrúi Trump tilkynnti um ráðningu Hicks í morgun. NBC greinir frá.
Hicks er þriðja í röðinni til að gegna starfi samskiptastjóra Trump frá því að hann tók við embætti forseta í janúar á þessu ári. Mike Dubke var samskiptastjóri Trump á undan Scaramucci, en hann tilkynnti um uppsögn sína í maí.
Hicks, sem er 28 ára, hefur verið hluti af teymi Trump allt frá því að hann tilkynnti um framboð sitt í júní 2015.