Tíu eru slasaðir eftir að heimatilbúin sprengja sprakk í verslunarmiðstöð í Pétursborg í Rússlandi í dag. Enginn hinna slösuðu er í lífshættu.
Samkvæmt upplýsingum frá lögreglu er talið að sprengjan sé heimatilbúin og er atburðurinn rannsakaður sem morðtilraun. „Samkvæmt bráðabirgðaniðurstöðum sprakk óþekktur hlutur inni í verslun,“ segir í tilkynningu frá talsmanni rannsóknarnefndar sem fer með rannsókn málsins.
Í tilkynningunni kemur jafnframt fram að sprengingin var á við 200 grömm af TNT-sprengiefni. Þá hafði ýmiss konar smáhlutum verið komið fyrir inni í sprengjunni til að valda sem mestum skaða.
Fámennt var í verslunarmiðstöðinni þegar sprengjan sprakk en hún var rýmd í kjölfarið. Enginn eldur kviknaði og verslunin þar sem sprengjan sprakk varð ekki fyrir miklum skemmdum.