Vladimír Pútín Rússlandsforseti segir að sprenging sem varð í stórmarkaði í St. Pétursborg í gær hafi verið hryðjuverk. Þrettán særðust í árásinni.
„Eins og þið vitið var hryðjuverk framið í St. Pétursborg í gær,“ sagði Pútín á fundi með herforingum í Kreml í dag.
Heimatilbúin sprengja sprakk í geymsluskáp í stórmarkaðinum í gærkvöldi, að því er lögregluyfirvöld segja.
Í apríl létust fimmtán í borginni eftir að sprengja sprakk í lest. Hópur sem tengist Al-Qaeda sagðist bera ábyrgð á því tilræði.