Páfinn afboðaði sig á síðustu stundu

Frans páfi hætti við að taka þátt í mikilvægri athöfn páskanna í Páfagarði á síðustu stundu í dag. Málið hefur endurvakið áhyggjur fjölmargra af heilsu páfans sem er 87 ára gamall. 

Vatíkanið greindi frá því að páfinn hefði hætt við að taka þátt í athöfninni til þess „varðveita heilsu sína“ fyrir aðra viðburði páskahelgarinnar. 

Hægindastóll páfans hafði verið settur upp á hæðina sem snýr að Colosseum-hringleikahúsinu í Róm þar sem athöfnin var haldin.

Stóllinn var síðan tekinn í burtu eftir að tilkynning barst um að páfinn myndi ekki mæta, stuttu áður en athöfnin hófst. 

Stóllinn var fjarlægður stuttu áður en athöfnin hófst. AFP/Alberto Pizzoli

Athöfnin felst í því að þúsundir manna koma saman til að biðja og minnast þess er Jesús var krossfestur á Golgata-hæð.  

„Til þess að varðveita heilsuna fyrir bænahaldið á morgun og páskamessuna mun Frans páfi fylgjast með athöfninni í kvöld frá Santa Marta aðsetrinu.“

Athöfnin felst í því að þúsundir manna koma saman til að biðja og minnast þess er Jesús var krossfestur á Golgata-hæð. AFP/Andreas Solaro

Í góðu standi fyrr í dag 

Páfinn missti einnig af athöfninni á síðasta ári þar sem hún átti sér stað stuttu eftir að Frans dvaldi á sjúkrahúsi með berkjubólgu. Þá var fjarvera hans þó tilkynnt með fyrirvara. 

Í febrúar greindi Páfagarður frá því að Frans hefði fengið „væga flensu“ sem leiddi til þess að hann afboðaði sig á nokkra viðburði og bað nokkrum sinnum aðra um að fara með ræður hans. 

Heimildarmaður AFP innan Vatíkansins sagði að „engar sérstakar áhyggjur“ væru af heilsu páfans í dag. 

Heimildarmaðurinn sagði að páfinn hefði verið í góðu standi fyrr í dag og að afboðunin hefði einfaldlega verið varúðarráðstöfun. 

.Stóll páfans áður en hann var fjarlægður. AFP/Andreas Solaro

Þétt dagskrá 

Dagskrá páfans um páskana er þétt.

Fyrr í dag var hann viðstaddur messu í Péturskirkjunni. Í gær þvoði hann tólf konum sem eru í fangelsi í Róm um fæturna. Á sunnudag mun hann stýra páskamessunni á Péturstorgi.

Frans hefur verið páfi frá árinu 2013 og hefur glímt við ýmsa heilsukvilla. Meðal annars hafa verkir í hnjám og mjöðmum leitt til þess að hann notast reglulega við hjólastól. 

Í júní fór hann í kviðslitaaðgerð, aðeins tveimur vikum eftir að hann var lagður inn á sjúkrahús vegna berkjubólgu og tveimur árum eftir að hann gekkst undir stóra ristilaðgerð. 

Frans hefur áður sagt að það sé möguleiki á að hann láti af embætti ef hann getur ekki sinnt skyldum sínum, líkt og forveri hans Benedikt 16. gerði. 

• Blogga um frétt