Dómstóll í Grikklandi vísaði frá ákærum á hendur níu grunaðra í gær í einu versta sjóslysi Miðjarðarhafsins og sagði að hann hefði ekki lögsögu til að dæma í málinu.
Togarinn Adriana var ryðgaður og ofhlaðinn flóttamönnum þegar hann sökk aðfaranótt 14. júní árið 2023. Í togaranum voru rúmlega 750 manns samkvæmt upplýsingum frá Sameinuðu þjóðunum en aðeins 82 lík fundust.
Níu grunaðir, sem voru á meðal þeirra 104 sem lifðu af, höfðu átt yfir höfði sér ákæru, þar á meðal fyrir manndráp af gáleysi, þátttöku í glæpasamtökum og að aðstoða við ólöglega komu inn í landið.
Mennirnir, sem eru á aldrinum 21 til 37 ára, voru í gæsluvarðhaldi undanfarna 11. mánuði og hefðu átt yfir höfði sér lífstíðarfangelsi yrðu þeir fundnir sekir.
Verjendur sakborninga héldu því fram að grískur dómstóll gæti ekki dæmt í málinu þar sem slysið hefði átt sér stað á alþjóðlegu hafsvæði.
Ríkissaksóknari féllst á málsvörn fyrr í dag sem leiddi til þess að dómstóllinn féll frá ákæru á hendur mönnunum.
„Dómstóllinn tekur undir rök ákæruvaldsins og segir að hinir níu ákærðu séu sýknaðir,“ sagði dómstóllinn í Kalamata í Suðvestur-Grikklandi.