Innlent | mbl | 7.2.2007 | 13:55 | Uppfært 21:40

Er Ísland best í heimi?

Metþátttaka verður á árlegu Viðskiptaþingi Viðskiptaráðs Íslands, sem fram fer í dag undir yfirskriftinni: „Ísland, best í heimi?“ Hátt í 500 manns sitja þingið, og er hvert sæti skipað.

Meðal gesta eru lykilmenn í íslensku viðskiptalífi, ráðherra, þingmenn, fræðimenn, erlendir sendiherrar og embættismenn. Umfjöllunarefni þingsins er alþjóðlegt orðspor og ímynd Íslands.

Erindi flytja Geir H. Haarde forsætisráðherra, Simon Anholt, einn helsti sérfræðingur heims í ímynd þjóða, Erlendur Hjaltason, forstjóri Exista og formaður Viðskiptaráðs, og Halla Tómasdóttir, framkvæmdastjóri Viðskiptaráðs.

Í ræðu sinni fjallar Anholt um niðurstöðu könnunar á ímynd Íslands í samanburði við önnur ríki, sem gerð var meðal hátt í 30 þúsund manna í 35 löndum en þar varð Ísland í 19. sæti meðal þeirra 38 landa sem rannsökuð voru. Þeir þættir sem eru skoðaðir eru útflutningur, stjórnhættir, menning og saga, fólkið, ferðamennska og innflutningur fólks og fjárfestingar.