Samfylkingin vill huga að nýsköpun og styðja sprotafyrirtæki

Á næstu 10 árum vill Samfylkingin að sérstaklega verði hugað að nýsköpun í atvinnulífinu og stuðningi við íslensk sprotafyrirtæki. Þetta er meðal áhersluatriða í nýrri stefnumótun flokksins í atvinnumálum, sem kynnt var á blaðamannafundi í dag. Segjast forsvarsmenn flokksins boða breytta forgangsröðun frá þeirri áherslu sem núverandi ríkisstjórn hafi lagt á stóriðju í atvinnustefnu stjórnvalda.

Samfylkingin vill að stefnt verði að eftirtöldum markmiðum:

• Tíföldun á útflutningsvirði hátæknifyrirtækja á Íslandi
• Fimmföldun á fjölda íslenskra sprotafyrirtækja.
• 5000 ný störf hafi orðið til í hátæknigeiranum.
• 20 ný hátæknifyrirtæki hafi náð milljarði króna í ársveltu eða verið skráð á hlutabréfamarkað á Íslandi.

Til að ná þessum markmiðum leggur Samfylkingin til að þegar í stað verði ráðist í eftirfarandi aðgerðir í samráði við Samtök Iðnaðarins og Samtök Sprotafyrirtækja:

• Fjórfalda framlag í Rannsóknarsjóð og Tækniþróunarsjóð á næstu 4 árum
• Breyta lögum um tekju- og eignaskatt til að heimila skattaívilnanir sem örva fjárfestingar einstaklinga í sprotafyrirtækjum
• Heimila endurgreiðslu rannsóknar- og þróunarkostnaðar að ákveðnu hámarki
• Bjóða út upplýsingatækni- og hugbúnaðarvinnu á vegum hins opinbera
• Koma upp stoðkerfi við öflun og vernd einkaleyfa og hugverkaréttinda.

Um er að ræða tillögur, sem unnu til verðlauna á nýafstöðnu Sprotaþingi Samtaka sprotafyrirtækja og Samtaka iðnaðarins sem haldið var á föstudag. Þar greiddu fundarmenn atkvæði um tillögur stjórnmálaflokkanna og urðu tillögur Samfylkingarinnar í þremur efstu sætunum.