Minni fíkniefnaneysla barna og ungmenna í Reykjavík en í samanburðarborgum

Ný rannsókn á fíkniefnaneyslu ungmenna í níu Evrópuborgum sýnir að neyslan er minni í Reykjavík en í samanburðarborgunum. Rannsóknin sýnir auk þess að fíkniefnaneysla barna og ungmenna er minnst í þeim borgum Evrópu þar sem gripið hefur verið til markvissra forvarnaraðgerða á vettvangi sveitarfélaga með náinni samvinnu foreldra, skóla og grasrótarsamtaka.

Þetta kom fram á fundi á Bessastöðum, sem Ólafur Ragnar Grímsson, forseti Íslands, efndi til í dag til að fylgja eftir Forvarnardeginum, sem haldinn var síðastliðið haust til að styrkja nauðsynlega forvarnarumræðu í landinu. Á fundinum var einnig fjallað um samstarf Evrópuborga í forvarnarmálum.

Tveir fræðimenn frá Háskólanum í Reykjavík, þau Inga Dóra Sigfúsdóttir og Álfgeir Kristjánsson, kynntu fyrstu niðurstöður hinna evrópsku rannsókna í forvörnum og þær niðurstöður sem Forvarnardagurinn á Íslandi hefði skilað.

Í tilkynningu frá forsetaembættinu segir, að telja megi ljóst að markverður árangur hafi náðst í Reykjavík á undanförnum tíu árum, enda sæki nú aðrar borgir í reynslu Íslendinga og tali um íslensku fyrirmyndina. Samtök evrópskra borga gegn fíkniefnum standa nú að sérstöku verkefni í 15 borgum í Evrópu þar sem sambærilegum aðferðum er beitt og verður framkvæmdinni stýrt frá Reykjavík. Lyfjafyrirtækið Actavis er aðalstyrktaraðili þessa verkefnis og forseti Íslands verndari þess.

• 1 blogg um fréttina

Bloggað um fréttina

• Gísli Bergsveinn Ívarsson: Gott að heyra, en ...