Rútubílstjóri misreiknaði sig í beygju - hættan minni en talið var í fyrstu

Svo virðist sem að rúta með rúmlega 40 frönskum ferðamönnum hafi ekki verið í eins mikilli hættu og talið var í fyrstu, en á fjórða tímanum í dag barst tilkynning til lögreglunnar og neyðarlínunnar um að rútan stæði út af klettabrún á Öndverðarnesi og væri við að að falla fram af henni. Að sögn lögreglunnar á Snæfellsnesi fór eitt hjóla rútunnar út fyrir vegarkant þegar ökumaðurinn misreiknaði sig í beygju skammt frá Beruvík í dag.

Lögreglan segir annan rútubílstjóra hafa tilkynnt um óhappið. Tilkynningin varð þó til þess að Samhæfingarmiðstöðin í Skógarhlíð var ræst og voru þyrlur Landhelgisgæslunnar t.d. að fara leggja af stað þegar aðstoðin var afturkölluð. Þá voru allar björgunarsveitir á Snæfellsnesinu í ræstar út og ljóst að viðbúnaður var mikill.

Lögreglan segir ferðamennina hafa sýnt stillingu og afþakkað þá áfallahjálp sem þeim bauðst.

Það voru verktakar sem unnu við vegaframkvæmdir á skammt frá sem komu rútunni til aðstoðar og drógu hana aftur upp á veginn. Fallhæðin fram af brúninni var á milli einn til tveir metrar að sögn lögreglu.

Rútan skemmdist ekkert og þá sluppu allir farþegarnir ómeiddir. Rútan hélt því áfram ferð sinni en hún stefndi til Grundafjarðar.

• 1 blogg um fréttina

Bloggað um fréttina

• Kjartan Pétur Sigurðsson: Misvísandi fréttaflutningur!