Ganga í tvo skóla vegna skilnaðar

Dæmi eru þess hér á landi að börn gangi í skóla í tveimur sveitarfélögum vegna skilnaðar foreldra. Umboðsmaður barna, Margrét María Sigurðardóttir, er efins um að slíkt sé heppilegt fyrir börn. „Það fer þó eftir hverju tilfelli fyrir sig," segir hún.

Börnum sem ganga í skóla í tveimur sveitarfélögum í kjölfar skilnaðar foreldra þeirra hefur fjölgað í Noregi. Umboðsmaður barna þar í landi varar við slíku fyrirkomulagi í tengslum við sameiginlegt forræði foreldranna yfir börnunum.

Birna Sigurjónsdóttir, verkefnisstjóri á grunnskólaskrifstofu á menntasviði Reykjavíkur, segir engar reglur gilda um mál af þessu tagi. „Við leysum bara hvert mál sem kemur upp. Börn hafa kannski verið sitt hvora vikuna í skólunum eða tímabundið hjá öðru foreldrinu. Það er bara reynt að leysa það með hagsmuni barnsins í huga. Það er ekkert í kerfinu sem er þessu til fyrirstöðu. Og á meðan tilfellin eru innan Reykjavíkur eru hæg heimatökin. Það þarf kannski meiri samninga þegar börnin fara á milli sveitarfélaga en það er ekkert óleysanlegt í því samhengi."

Formaður Skólastjórafélags Íslands, Hanna Hjartardóttir, veit dæmi þess að barn hafi gengið í skóla í tveimur löndum.

Nánar í Blaðinu

• 7 blogg um fréttina

Bloggað um fréttina

• Eyjólfur Sturlaugsson: Erfitt í framkvæmd
• Sigrún Einars: Vaknið foreldrar
• Valgerður Halldórsdóttir: Sveigjanleiki foreldra mikilvægari?
• Markús frá Djúpalæk: Einn er nógu erfitt
• Högni Jóhann Sigurjónsson: Mér fannst nú nóg um.
• Kjartan Pálmarsson: Eiginhagsmunir foreldra á hæstu hæðum
• Gísli Gíslason: Sameiginleg forsjá í sama hverfi er best.