Stjórn Bændasamtaka Íslands lýsir yfir miklum vonbrigðum með að ekki hafi tekist að uppfylla það markmið fjarskiptaáætlunar stjórnvalda að allir landsmenn ættu kost á háhraðatengingum við netið á árinu 2007.
Bændasamtökin vísa til þess, að samkvæmt skýrslu fyrrverandi samgönguráðherra, sem lögð var fyrir Alþingi á síðasta ári, hafi íbúar um 40% lögbýla á landsbyggðinni ekki átt kost á háhraðatengingum. Þá hafi komið fram í umfangsmikilli skoðanakönnun meðal bænda, sem Bændasamtökin létu gera í nóvember síðastliðinn, að 48% þeirra sem eru nettengdir hafi ekki aðgang að ADSL-tengingum og búa við gamaldags innhringisamband, ISDN eða ISDN+.
„Notendur ADSL-þjónustu Símans í þéttbýli eru með um 100 sinnum hraðvirkara gagnaflutningssamband en notendur ISDN í dreifbýli sem að auki greiða um 60 sinnum hærra verð fyrir gagnaflutningsgetu en ADSL-notendur. Þessi mikli aðstöðumunur er mjög neikvæður fyrir íbúa á landsbyggðinni, sérstaklega í ljósi þess að ráðgjafarstarf BÍ byggir í meira mæli á tölvusamskiptum og miðlægri gagnavinnslu. Gott og öruggt netsamband er því ein af forsendum framfara í landbúnaði og bættum búrekstri," segir m.a. í tilkynningu Bændasamtakanna.