Innlent | mbl | 12.4.2008 | 11:29 | Uppfært 16:54

Fastur í skotti bifreiðar við Miklubraut

mbl.is/Július

Lögreglunni á höfuðborgarsvæðinu barst tilkynning í morgun um að maður væri í skotti bifreiðar á Miklubrautinni til móts við Miklatún. Blaðberi nokkur var að bera út blöð á Miklubrautinni þegar hann heyrði hróp og köll og spörk úr skotti bifreiðarinnar.

Þegar lögregla kom á vettvang var bifreiðin ekki í gangi og vélin köld. Lögreglan opnaði skottið og fann mann á tvítugsaldri í annarlegu ástandi í skotti bifreiðarinnar. Aðspurður sagðist maðurinn ekki hafa hugmynd um hvernig hann endaði þar. Að sögn lögreglu var haft samband við eiganda bílsins en hann var sofandi heima hjá sér og kannaðist ekkert við málið.