Hálendisbjörn er hugsanlegur
Hvítabjörn á hálendi Íslands er ekki allt of ósennilegt að mati Þorsteins. Reuters
„Þessi dýr geta farið hratt yfir og þetta er ekkert allt of ósennilegt," sagði Þorsteinn Sæmundsson forstöðumaður náttúrustofu Norðurlands í samtali við Fréttavef Morgunblaðsins er hann var inntur eftir skoðun hans á meintum bjarndýrssporum á Hveravöllum.
Þorsteinn sagði að fyrst þyrfti að staðfesta að um bjarndýrsspor væri að ræða áður en nokkur hætta væri talin á ferðum.
Þorsteinn sagði að hvítabirnir ferðist ótrúlegar vegalengdir á hverju ári. Þeir eru harðger dýr sem geta lifað mánuðum saman án matar og éta þá gróður og þang.
„Þessi vegalengd frá sjó og upp á hálendi Íslands er ekkert stórkostlegt þó að þetta sé langt og að það sé skrýtið að enginn hafi séð til hans ef þetta er björn," sagði Þorsteinn að lokum.
Lögreglan á Blönduósi segir að athugað verði í fyrramálið hvort gripið verði til frekari aðgerða. Að sögn varðstjóra komu lýsingar ferðamannanna heim og saman við bjarndýrsþófa og gátu þau teiknað upp mynd af sporunum sem virtist mjög trúverðum.
