Vinnusamningum TR fer fjölgandi

Þeim einstaklingum sem gera vinnusamninga með aðstoð Tryggingastofnunar fer fjölgandi ár frá ári og stefnir í að um 400 lífeyrisþegar nýti sér vinnusamningana á þessu ári. Þetta kemur fram á vef Tryggingastofnunar. 

Fjöldi þeirra sem eru með vinnusamninga hefur vaxið ár frá ári en þeir eru hugsaðir sem tækifæri fyrir einstaklinga með skerta starfsgetu til að hljóta þjálfun til starfa á almennum vinnumarkaði.

Árið 2003 voru 237 einstaklingar með slíka samninga en áætlað er að á þessu ári verða þeir um 400.

Tryggingastofnun hefur heimild til að semja við atvinnurekendur á almennum vinnumarkaði um að ráða starfsfólk sem nýtur tiltekinna greiðslna lífeyristrygginga. Sumir eru með vinnusamning í nokkur ár en aðrir gera samninga til styttri tíma.

Viðkomandi verður að njóta örorkulífeyris, örorkustyrks, endurhæfingarlífeyris eða slysaörorku sem er undir 50% samkvæmt mati læknis til að geta gert vinnusamning með þessum hætti. Miðað er við að einstaklingar sem falla undir þessi skilyrði hafi ekki verulegar aðrar tekjur en greiðslur frá Tryggingastofnun.

• 1 blogg um fréttina

Bloggað um fréttina

• Snorri Bergz: Allir eiga von