Bleikjunni vel tekið í Bandaríkjunum

Sala á ferskri íslenskri bleikju í verslunum Whole Foods Market (WFM) í Bandaríkjunum tólffaldaðist undir lok júnímánaðar. Þá seldust tæp fimm tonn af bleikju á einni viku en venjulega hafa selst um 4-500 kg af bleikju á viku. Bleikjan hefur til þessa aðallega verið seld til veitingahúsa en nú er að hefjast markaðssókn beint til neytenda.

Markaðsátakið var gert í 30 verslunum en stefnt er að því að bjóða bleikjuna til kaups í fleiri verslunum keðjunnar víða um Bandaríkin. WFM rekur nú um 300 verslanir.

Í síðustu viku júnímánaðar var Íslandskynning í nokkrum verslunum WFM á höfuðborgarsvæði Bandaríkjanna, í Washington og nágrenni. Íslenskir matreiðslumenn kynntu þar íslenskar matvörur og tók sala á smjöri, ostum, skyri og íslensku súkkulaði einnig kipp.

Steiktu flök úr íslensku smjöri

Söluaukninguna má þakka mikilli kynningu á íslenskum matvælum sem efnt var til í völdum verslunum keðjunnar í síðustu viku júní í samvinnu við átaksverkefnið Áform. Baldvin Jónsson, framkvæmdastjóri Áforms, sagði að um 20 þúsund viðskiptavinir hafi komið á kynningarnar. Á matarkynningunni steiktu íslenskir matreiðslumeistarar bleikjuflök upp úr íslensku smjöri og bragðbættu með möndlum, dilli og salti. Viðskiptavinir fylgdust með því þegar bleikjuflökunum var brugðið á pönnuna í fáeinar mínútur og fengu síðan að smakka. Leið margra þeirra lá beint að fiskborðinu þar sem bleikjuflökin seldust sem aldrei fyrr. Matreiðslumennirnir kynntu einnig aðrar vörur sem sýndar voru á íslenska sælkerahlaðborðinu og dreift var bæklingum um Ísland og íslensk matvæli sem WFM-verslunarkeðjan hafði útbúið.

Auk þess var íslenskur matur á borðum í árlegri hátíðarveislu samtaka veitingahúsa á Washington-svæðinu og mættu tæplega tvö þúsund stjórnendur og fagfólk í veitingahúsarekstri í veisluna. Í forrétt var reykt íslensk bleikja, skyr og basil-ravioli, Dímon ostur með peru o.fl. Aðalrétturinn var íslenskt lamb og uppistaðan í eftirréttinum var skyr. Siggi Hall var sérstakur ráðgjafi matreiðslumanna Marriott-hótelsins við undirbúning kvöldverðarins.