mbl.is

Friðrik segir að þetta snúist ekki aðeins um vottun sjálfbærra veiða, heldur sé tekist á um réttinn til að stýra fiskveiðum og nýta villta fiskistofna – hvort lýðræðislega kjörin stjórnvöld geri það eða umhverfisverndarsamtök í gegnum kjörbúðir.

Og málið er litið alvarlegum augum af LÍÚ, sem hyggur á aðgerðir. „Við höfum tekið það upp við íslensk stjórnvöld að þau beiti sér af alefli til að koma í veg fyrir að þetta hafi frekari skaðleg áhrif,“ segir Friðrik. „Fulltrúar íslenskra stjórnvalda hafa farið til fundar við svissneska stórmarkaðakeðju til að kynna málstað okkar en vandinn liggur í því að keðjurnar láta WWF stjórna því hvaða fisk þær selja.“

LÍÚ hefur ásamt sendiráði Íslands í London, fulltrúa Hafrannsóknastofnunar og sjávarútvegsráðherra skipulagt fundi með helstu fiskkaupendum í Bretlandi til að kynna íslenska fiskveiðistjórnun og ástand fiskistofna. Og íslenskur sjávarútvegur vinnur að því á vettvangi Fiskifélagsins að koma á vottun um ábyrgar veiðar úr helstu nytjastofnum við Ísland. Byggt verður á leiðbeiningareglum FAO, Matvæla- og landbúnaðarstofnunar Sameinuðu þjóðanna, og óháður aðili verður fenginn til að votta veiðarnar.