Landsvirkjun ekkert eyland

„Við erum ekkert eyland, við erum fyrirtæki og fyrir framkvæmdum þurfum við lán og lánamarkaðir eru erfiðir um allan heim. Það þýðir að nú þarf að leggja meiri áherslu á að tryggja alla fjármögnun fyrir upphaf framkvæmda,“ segir Þorsteinn Hilmarsson, upplýsingafulltrúi Landsvirkjunar, spurður um getu fyrirtækisins til þess að fara í framkvæmdir.

Ekki eins mikill ákafi

Þorsteinn segir að nú standi yfir undirbúningur vegna framkvæmda við Búðarhálsvirkjun og að búið sé að bjóða út véla- og rafbúnað fyrir hana. Orkan frá henni fer til gagnavers Verne holding á Keflavíkurflugvelli og stækkunar álversins í Starumsvík. Þorsteinn segir að mikill áhugi hafi verið frá hugsanlegum orkukaupendum að undanförnu. „En auðvitað eru menn ekki eins ákafir í að fara út í framkvæmdir og byggja ný mannvirki þegar ljánsfjárkreppa er í heiminum. “

Reksturinn tryggður

„Landsvirkjun hefur verið starfrækt í Bandaríkjadölum frá síðustu áramótum. Meirihluti tekna okkar er í Bandaríkjadölum en svo skuldum við á móti í erlendum gjaldmiðlum,“ segir Þorsteinn og bætir við: „Við erum alveg örugg með þann rekstur sem við erum í.“ Hann segir að fyrirtækið hafi nægt handbært fé og tekjur sem dugi fyrir skuldbindingum út næsta ár.