Yrði illt að sjá á eftir LÍÚ úr Samtökum atvinnulífsins

„Þetta kemur í sjálfu sér ekkert á óvart en vissulega yrði illt að sjá á eftir þeim úr samtökunum. Ef þeir fara út þá eru þeir alltaf velkomnir til baka,“ segir Vilhjálmur Egilsson, framkvæmdastjóri Samtaka atvinnulífsins, (SA) um þá hótun Landssambands íslenskra útvegsmanna, LÍÚ) að segja sig úr SA verði samtökunum beitt fyrir inngöngu í Evrópusambandið.

Vilhjálmur segir samtökin úr sjávarútvegi mjög traust og mikilvæg í SA. Þau hafi lagt mikið af mörkum til SA. Það styrki augljóslega ekki samtökin ef útgerðarfélögin segi sig úr SA.

„En það sem málið snýst líka um er það að flest hinna aðildarsamtaka SA hafa aðra skoðun á þessu máli. Framkvæmdastjórnin taldi því skynsamlegast að kanna, meðal aðildarfélaga, afstöðuna til ESB-aðildar. Það lægi þá fyrir hver afstaðan væri. Það er svo stjórnarinnar að taka ákvörðun,“ segir Vilhjálmur.

Hann segir að það hafi alltaf legið fyrir að aðild að sjávarútvegsstefnu ESB yrði skref afturábak fyrir íslenskan sjávarútveg. Spurningin sé bara hversu stórt það skref yrði.

„En að sjálfsögðu mundi sjávarútvegurinn, líkt og aðrar greinar, hafa hag af því að taka upp evru, fá efnahagslegan stöðugleika og lægri vexti. Í aðildarviðræðum myndu menn reyna að ná einhverri málamiðlun hvað sjávarútveginn varðar en það verður aldrei hægt að halda því fram að ESB-aðild yrði skref fram á við fyrir sjávarútveginn,“ segir Vilhjálmur Egilsson, framkvæmdastjóri SA.

• 3 blogg um fréttina

Bloggað um fréttina

• Heimir Lárusson Fjeldsted: Umræðan um Evrópusambandsaðild klýfur Samtök atvinnulífsins. Er Bandaríkjadalur kostur?
• Jóhann Pétur Pétursson: Áhugaverð játning.
• Jón Aðalsteinn Jónsson: Áfram eða afturábak