Joly segir brandara að hafa fimm menn í rannsóknum
Eva Joly. mbl.is/Billi
Eva Joly, sérstakur ráðgjafi íslenskra yfirvalda varðandi rannsókn á efnahagsbrotum sem tengjast hruni fjármálakerfisins, segir það brandara að sérstakur saksóknari vegna bankahrunsins hafi fjóra menn sér til aðstoðar.
Nefnir hún til samanburðar mál sem er til rannsóknar í Noregi en tuttugu manns vinna við rannsókn þess.
Joly var spurð að því að loknu erindi sínu í Háskólanum í Reykjavík í dag hvernig hægt sé að tryggja það að rannsókn á bankahruninu endi með málsóknum gegn þeim sem gerst hafi brotlegir.
Sagði hún mikilvægt að tryggja að saksóknari hafi nægilegan mannafla og fé til rannsókna. Þá verði að tryggja að hann hafi sem mest sjálfstæði og að sem mestum upplýsingum verði haldið til haga þannig að mál haldi fyrir rétti.
Joly sagði einnig mikilvægt að Íslendingar geri sér grein fyrir því að oft dugi ekki að senda fyrirspurnir í bréfum heldur þurfi að senda menn á staðinn til að liðka fyrir framgangi mála með persónulegum samskiptum. Slíkt kosti peninga en ætli menn að ná árangri sé það nauðsynlegt.Einnig sagði hún mikilvægt að gefast ekki upp við upplýsingaöflun, þótt tregleika gangi í fyrstu.
Þá vonist hún til að sú neikvæða umræða sem nú fari fram um skattaskjól mundi leiða til þess að auðveldara verði að nálgast upplýsingar þaðan. Að vegna athyglinnar muni forsvarsmenn þeirra nú reyna að sýna umheiminum sitt besta andlit.
mbl.is
