Illa gengur að ráða í störf

„Við fáum þau skilaboð frá fyrirtækjum að illa gangi að ráða fólk í ákveðin störf þrátt fyrir mikið atvinnuleysi,“ segir Vilhjálmur Egilsson, formaður Samtaka atvinnulífsins.

„Það er augljóst að vinnumiðlunin hjá Vinnumálastofnun vinnur ekki nægilega skipulega. Það er ekki nógu öflugt samband milli fyrirtækja sem eru að ráða fólk og fá ekki fólk í vinnu og svo hins vegar Vinnumálastofnunar. Fólk kemst greinilega upp með að vinna ekki þó því standi vinna til boða.“

Samkvæmt lögum um atvinnuleysistryggingar varðar það bótamissi að hafna starfi sem býðst með sannanlegum hætti. Á vef Vinnumálastofnunar er langur listi yfir störf í boði, sem ekki virðist hægt að manna þrátt fyrir mikið atvinnuleysi.

„Óeðlilega stór hópur“

Samtök atvinnulífsins gagnrýna einnig þá nýbreytni að sjálfstætt starfandi aðilar geti talist sjálfstætt starfandi að hluta og fengið hlutabætur á móti. „Við vorum ekkert höfð með í ráðum í tengslum við þá ákvörðun. Það fyrirkomulag virðist alls ekki virka enda eru nú um 1.500 til 2.000 manns sem þiggja slíkar bætur. Það er óeðlilega stór hópur.“