Aðeins hægt að breyta Icesave-lögum á Alþingi

Þingflokkur framsóknarmanna segir í ályktun, að ef fulltrúar Breta og Hollendinga sætti sig ekki að hluta eða í heild við lög um ríkisábyrgð vegna Icesave-samninganna, fellur ábyrgðin úr gildi og þeir fyrirvarar sem við hana eru. Þetta kemur fram í lögunum sjálfum.

Þingflokkurinn áréttar einnig í ályktun, að einungis sé hægt að breyta lögum á vettvangi Alþingis. Allar breytingar á forsendum ríkisábyrgðarinnar felli hana einnig úr gildi.

„Þingflokkurinn ítrekar þá skoðun sína að farsælast sé fyrir þjóðina og lyktir þessa máls að samið sé að nýju við Breta og Hollendinga enda samningarnir óaðgengilegir og mikill vafi á að almenningi beri að greiða þessar skuldir. Þingflokkurinn telur grundvallaratriði að færustu sérfræðingar þjóðarinnar og á alþjóðavísu leiði nýjar samningaviðræður.

Enn á ný einkennist málatilbúnaður ríkisstjórnarinnar af leyndarhjúp og pukri. Þingflokkur framsóknarmanna hafnar slíkum vinnubrögðum og krefst þess að meint tilboð Breta og Hollendinga verði gert opinbert nú þegar.

Loks ítrekar þingflokkur framsóknarmanna mikilvægi þess að ríkisstjórn Íslands fari opinberlega fram á skýringar á þeim óeðlilega drætti sem orðið hefur á afgreiðslu málefna Íslands hjá Alþjóðagjaldeyrissjóðnum," segir í ályktun flokksins.

• 3 blogg um fréttina

Bloggað um fréttina

• Guðrún María Óskarsdóttir.: Að sjálfsögðu er það Alþingis að breyta eigin lögum.
• Eggert Guðmundsson: Léttari greiðslubyrði!!
• Baldur Sigurðarson: Í mál vegna IceSave og það stax. Nota tækifærið.