Borgin virði jafnrétti kynjanna

Borgarstjórn samþykkti á fundi sínum í dag að skrifa undir Evrópusáttmála um jafna stöðu kvenna og karla. Þau sveitarfélög sem undirrita sáttmálann skuldbinda sig formlega til að virða grundvallarregluna um jafnrétti kvenna og karla.  

„Undirritunin er liður í að styðja við það öfluga jafnréttisstarf sem ríkt hefur innan borgarinnar og fellur vel að því forystuhlutverki sem Reykjavíkurborg hefur verið í á undanförnum áratugum að því er varðar jafnrétti kynjanna. Reykjavíkurborg skuldbindur sig til að gera aðgerðaráætlun sína og önnur opinber gögn sem skipta máli aðgengileg svo leggja megi mat á árangur,“ segir m.a. í tilkynningu frá borginni. 

Þar kemur einnig fram að það hafi verið í framhaldi af tillögu borgarfulltrúa Samfylkingarinnar, sem einróma var samþykkt í borgarstjórn Reykjavíkur, að mannréttindaráði var falið að kanna hvort Reykjavíkurborg fullnægði öllum skilyrðum til að gerast aðili umrædds sáttmála. 

Skoðun mannréttindaráðs leiddi í ljós að Reykjavíkurborg fullnægir öllum þeim skilyrðum, en sveitarfélögin sem undirrita sáttmálann er ætlað að vinna aðgerðaráætlun í jafnréttismálum þar sem verkefnum er forgangsraðað. Sáttmálinn fellur vel að mannréttindastefnu Reykjavíkurborgar og er nú þegar unnið að mörgum ákvæðum hans.

Jafnréttisstofa veitir sveitarfélögum faglega aðstoð við innleiðingu sáttmálans. Undirritun felur í sér aðgang að tengslaneti evrópskra sveitarfélaga um jafnréttismál og gefst því Reykjavíkurborg tækifæri til að miðla sinni reynslu í jafnréttismálum og læra af reynslu annarra. Samkvæmt upplýsingum á vefsíðu Evrópusamtaka sveitarfélaga og héraða þá hafa 903 borgir og sveitarfélög í Evrópu undirritað sáttmálann. Má þar nefna Helsinki, Stokkhólm og Aþenu.

• 3 blogg um fréttina

Bloggað um fréttina

• Frjálshyggjufélagið: Bruðl með skattfé
• Snorri Páll Snorrason: Hvað er þá jafnrétti
• Guðrún María Óskarsdóttir.: " Halelúja ... "