Unglingar vilja borða oftar með fjölskyldu sinni og fara með henni í ferðalög. Þeir telja að samvistir með fjölskyldunni efli sjálfstraust þeirra. Til að auka samverustundir telja unglingarnir að þeir geti verið oftar heima og minna í tölvunni.
Þetta er meðal niðurstaðna sem könnun á meðal 9. bekkinga á Forvarnardaginn 2009 leiddi í ljós.
Dagskrá Forvarnardagsins fólst í verkefnavinnu í 9. bekkjum grunnskólanna. Tilgangur hennar er að fá fram sjónarmið unglinganna sjálfra, skoðanir þeirra og fengu þeir meðfylgjandi spurningar að glíma við.
Dagurinn var haldinn í samvinnu við Samband íslenskra sveitarfélaga, Íþrótta- og Ólympíusamband Íslands, Ungmennafélag Íslands, Bandalag íslenskra skáta, Reykjavíkurborg, Háskólann í Reykjavík og Háskóla Íslands auk lyfjafyrirtækisins Actavis, sem var sérstakur stuðningsaðili verkefnisins.