Fjölskylduhjálp Íslands veitti í dag tveimur sjálfboðaliðum viðurkenningar fyrir störf sín í þágu félagsins. Sjálfboðaliði ársins var valinn Sigurður Vilhelm og heiðurskona nr. 2 var útnefnd Ragna Þórunn Rósantsdóttir.
Fjölskylduhjálp Íslands hélt boð nú síðdegis þar sem þrjú fyrirtæki voru útnefnd fyrirtæki mannúðar fyrir árið 2009. Þá fengu tveir sjálfboðaliðar á áttræðisaldri viðurkenningu fyrir störf sín.
Ragna Þórunn Rósantsdóttir er ein af stofnendum Fjölskylduhjálparinnar og hefur unnið við sjálfboðastörf í 18 ár. Hún vinnur þar alla miðvikudaga í fatadeild og segir gott að hafa fastan punkt til að stefna að í vikunni.
„Þetta kom mér mjög á óvart,“ segir hún um útnefninguna. Ragna starfaði fyrir Mæðrastyrksnefnd í tæp 13 ár áður en hún tók þátt í að stofna Fjölskylduhjálp Íslands árið 2004.
„Sjálfboðastarf er mjög gefandi, finnst mér. Í fyrstu var ég beðin um að koma og aðstoða í Mæðrastyrksnefnd og fannst það bara afskaplega skemmtilegt og gefandi.“
Ragna, sem er 78 ára gömul, var þó ekkert hætt að vinna þegar sjálfboðastarfið hófst en hún vann hjá Sýslumanninum í Reykjavík þar til fyrir rúmum þremur árum.
„Það er svo gaman að vinna,“ segir Ragna og bætir við að hún ætli að vinna við sjálfboðastörf eins lengi og hún geti.