Frakkar fuku í húsbíl

Franskir ferðamenn lentu í hremmingum við Sandfell í Öræfum þegar húsbíll sem þeir voru á fauk út af veginum og endaði á hvolfi. Frakkarnir, hjón með kornabarn, sluppu þó án meiðsla og fengu far í Skaftafell með vegfaranda sem átti leið hjá að sögn lögreglunnar á Eskifirði.

Húsbíllinn er mikið skemmdur og segir lögreglan að ekki verði reynt að fjarlægja hann fyrr en veðrinu slotar en mikið óveður hefur verið á svæðinu og vindurinn farið upp í 40 metra á sekúndu. 

Mjög hvasst er nú undir Eyjafjöllum og ösku- eða sandfok á Skógasandi og Sólheimasandi, þrátt fyrir rigningu, samkvæmt upplýsingum frá Vegagerðinni.

Þar sem búast má við hvössum vindi víða á landinu er fólk beðið að huga vel að aðstæðum ef það ætlar að ferðast með húsbíla, létta vagna eða önnur farartæki sem þola illa vind.


 

• 2 blogg um fréttina

Bloggað um fréttina

• Einar Sveinbjörnsson: Vandkvæði við miðlun upplýsinga til erlendra ferðamanna
• Sigurður Haraldsson: Merkilegt!