Innlent | Morgunblaðið | 22.9.2010 | 5:30 | Uppfært 6:11

Vantar úrræði fyrir ungar konur í neyslu

Aldrei hefur verið meiri aðsókn í Konukot en nú. mbl.is/Ásdís

Ungum konum hefur fjölgað mjög í hópi þeirra kvenna sem leita skjóls hjá Konukoti. Ísabella Björnsdóttir, nemi í félagsráðgjöf og starfskona Konukots, segir að þótt ýmislegt sé í boði fyrir þessar konur sé stundum eins og vanti sérsniðin úrræði fyrir ungar konur í neyslu.

„Því það er svo mikil von ennþá í þeim, þetta eru flottar stelpur, þær eru bara á slæmum stað í lífinu og þurfa hjálp,“ segir hún í Morgunblaðinu í dag.

Ísabella telur fólk almennt ekki gera sér grein fyrir þörfinni fyrir athvarf af þessu tagi. „Hingað hafa komið nýjar konur í hverjum mánuði það sem af er árinu. Yfirleitt eru þær mjög þakklátar fyrir það sem fyrir þær er gert og það er yndislegt að fá að kynnast þeim.“