Hörð skrif gegn borgarstjóra
Jón Gnarr, borgarstjóri, á fundi borgarstjórnar í dag. mbl.is/Sigurgeir
Jón Gnarr, borgarstjóri, sagði í umræðum á fundi borgarstjórnar í dag, að hann hefði alist upp við það að Morgunblaðið væri málgagn Sjálfstæðisflokksins eins og Þjóðviljinn hefði verið málgagn vinstri manna. Bæði blöðin hefðu verið keypt heima hjá honum.
Jón sagði fyrr í umræðunni, að í vinnuferlinu varðandi tillögur um sameiningu grunnskóla og leikskóla hafi verið unnin ákveðin pólitísk skemmdarverk og pólitísk öfl hefðu nýtt sér skipulagshæfileika sína og fjölmiðlatengsl til að ala á tortryggni og sá ótta. Borgarfulltrúar minnihlutans gagnrýndu Jón harðlega fyrir þessi ummæli og sögðu að harðasta gagnrýnin á tillögurnar hefði komið frá fulltrúum skóla og foreldra.
Jón sagði einnig í umræðunni að hann væri maður til að tala fyrir sig sjálfur og þurfi ekki að tala í gegnum Davíð Oddsson og Agnesi Bragadóttur. Í síðari ræðu sinni sagði Jón, að Morgunblaðið hefði að undanförnu haldið uppi mjög hörðum skrifum og persónulegum svívirðingum um hann og þar hefði Agnes Bragadóttir, blaðamaður, farið fremst í flokki.
„Hvað eru þau skrif annað en ofbeldi og dónaskapur?" sagði Jón. Spurði hann hvers vegna hann ætti að vera annarrar skoðunar en þeirrar, að þessi skrif tengdust, beint eða óbeint, Sjálfstæðisflokknum.
Hanna Birna Kristjánsdóttir, forseti borgarstjórnar, bað borgarstjóra að gæta orða sinna og sagði að samkvæmt samþykktum borgarstjórnar mætti ekki saka fólk um ofbeldi og annað, sem ekki hefur tækifæri til að svara fyrir sig.
„Lestu umsagnir foreldra, frekar en Morgunblaðið," sagði Þorbjörg Helga Vigfúsdóttir, borgarfulltrúi Sjálfstæðisflokksins. „Hættu að lesa Morgunblaðið og láttu það ekki trufla þig þótt einhver sé að pota í þig eða teikna einhverjar myndir."
Sóley Tómasdóttir, borgarfulltrúi Vinstri grænna, gagnrýndi Jón harðlega eftir fyrri ræðu hans og sagði hana hafa verið einkar óviðeigandi og það færi borgarstjóra, sem talaði um ofbeldi og skítkast illa að tala um skotgrafir. Þá færi það borgarstjóra, sem héldi úti eigin sjónvarpsþætti, illa að tala um misnotkun borgarfulltrúa á fjölmiðlum.
Jón sagði í síðari ræðu sinni að Sóley hefði með þessum ummælum verið að verja Morgunblaðið en því mótmælti Sóley harðlega.
