Stjórnarmeirihlutinn í endalausum partíum

Stjórnarmeirihlutinn hefur ekkert vit á því hvernig staðan er í sjávarútvegi enda ekki ekki hægt að búast við því þar sem hann er bara í endalausum partíum í einhverjum karlaklúbbum, sagði Árni Johnsen, þingmaður Sjálfstæðisflokksins, á Alþingi rétt í þessu.

„Ríkisstjórnin fer bara í silkibrækurnar sínar og tjúttar inni í einhverjum partíum og allt er þetta mál með þeim hætti, að það er eins og það sé einhver karlaklúbbur á blússandi fylleríi, sem skilar tillögum inn í Alþingi Íslendinga," sagði Árni.

Fór Árni afar hörðum orðum um frumvörpin og sagði þau rugl og kjaftæði og að yrðu þau að lögum myndu þau kippa rekstrargrundvellinum undan sjávarútvegsfyrirtækjum til að mynda í Vestmannaeyjum.

Sagði hann erfitt að ræða þessi mál í alvöru því endarnir væru allir trosnaðir og ekkert væri gert upp og spæst.  „Svo á að setja í skoðun og umfjöllun og ferli og umræðupólitík. Hvað er þetta fólk að gera í pólitík? Það ætti að banna því að vera í pólitík, þetta eru hryðjuverkamenn, skemmdarverkamenn," sagði Árni og bætti strax við að hann tæki aftur hluta af þessu orði. Ragnheiður Ríkharðsdóttir, sem sat í forsetastól, bað Árna að gæta orða sinna. 

Kvartaði hann undan því að stjórnarþingmenn væru lítt viðstaddir umræðuna á þingi um kvótafrumvörpin og flýðu undan gagnrýni á frumvörp ríkisstjórnarinnar um breytingar í sjávarútvegi.

Þingmenn stjórnarandstöðunnar hafa ítrekað kvartað yfir því í dag að ráðherrar og stjórnarþingmenn væru ekki viðstaddir umræðuna í þinginu. Þorgerður Katrín Gunnarsdóttir, þingmaður Sjálfstæðisflokksins, vakti þannig t.a.m. athygli á að enginn þingmaður Vinstrihreyfingarinnar - græns framboðs væri á mælendaskrá í dag um frumvörpin.

• 1 blogg um fréttina

Bloggað um fréttina

• Jón Ingi Cæsarsson: Sjálfstæðisflokkurinn beitir breiðu spjótunum.