Brátt hverfur síðasta bankaútibúið af Laugaveginum þegar Landsbankinn flytur útibú sitt frá Laugavegi 77 í Borgartún 33. Bankinn lét byggja húsið árið 1961 og hefur verið með starfsemi þar síðan.
Útibúið á Laugavegi 77 hefur í nokkurn tíma verið stærsta útibú bankans en fjölmargir einstaklingar og fyrirtæki eru með viðskipti þar.
Fyrr á árum voru fjölmörg bankaútibú á Laugavegi og í Bankastræti. Því má segja að brotthvarf Landsbankans marki tímamót í sögu miðbæjarins. Nýja útibúið í Borgartúni tekur til starfa eftir áramót þegar Laugavegsútibú og útibúið í Holtagörðum sameinast að fullu.
Í Morgunblaðinu í dag kemur fram, að breyttir viðskiptahættir og hagræðing séu aðalástæða breytinganna en stærstur hluti þjónustu bankans við viðskiptavini fer nú fram í gegnum tölvu eða síma.