Átak stendur nú yfir gegn svartri atvinnustarfsemi. Golli / Kjartan Þorbjörnsson

Fulltrúar Alþýðusambands Íslands, Samtaka atvinnulífsins og ríkisskattstjóra hafa heimsótt um 1500 fyrirtæki frá um miðjan júní þegar átak hófst gegn svartri atvinnustarfsemi.

Markmiðið með átakinu er að hvetja bæði atvinnurekendur og launafólk til að standa rétt að skattskilum og samningum sín í milli.  Athyglinni hefur einkum verið beint að litlum og meðalstórum fyrirtækjum og áhersla lögð á að svört atvinnustarfsemi, undanskot á sköttum og launatengdum gjöldum og brot á kjarasamningum séu skaðleg fyrir alla hlutaðeigandi og samfélagið í heild sinni.

Fulltrúar aðilanna þriggja hafa veitt fyrirtæjum ráðgjöf og fræðslu um viðeigandi reglur og lagaramma ásamt því að hvetja atvinnurekendur og launafólk til að gera nauðsynlegar úrbætur ef þurfa þykir.

Segir ríkisskattstjóri, að megináhersla átaksins felist í að vekja fólk til umhugsunar um neikvæðar afleiðingar hvers konar undanskota og svartrar atvinnustarfsemi fyrir þjóðfélagið í heild. Svört atvinnustarfsemi virðist vera að aukast og sterkasta vopnið til að vinna bug á henni sé fræðsla og almenn viðhorfsbreyting. 

Embættið segir, að fyrsta áfanga verkefnisins ljúki í lok ágúst og verði niðurstöður kynntar í lok september eftir að unnið hefur verið úr fyrirliggjandi gögnum. Að jafnaði hafi um 12-14 starfsmenn unnið við verkefnið og sé reiknað með að fjöldi fyrirtækja sem hafa verið heimsótt verði orðin um 2000 í lok mánaðarins.

Þá hafi verið kannað starfssamband hátt í 5000 einstaklinga hjá þessum rekstraraðilum og reiknað sé með að sú tala verði komin vel á sjötta þúsundið í lok ágúst.