Innlent | mbl | 10.9.2011 | 18:35 | Uppfært 20:04

Treysta Hönnu Birnu best

Hanna Birna Kristjánsdóttir á kosningavöku Sjálfstæðisflokks 2009. hag / Haraldur Guðjónsson

Ríflega 40% aðspurðra í könnun sem Capacent Gallup gerði að ósk stuðningsmanna Hönnu Birnu Kristjánsdóttur treysta henni best til að leiða Sjálfstæðisflokkinn. Til samanburðar nefndi 11,1% aðspurðra Bjarna Benediktsson, núverandi formann flokksins, að því er fram kom í kvöldfréttum Stöðvar 2.

Að sögn Hönnu Birnu er könnunin ekki á hennar vegum.

Þá nefndu 7,6% Kristján Þór Júlíusson, 5,5% Ólöfu Nordal og 1,9% Guðlaug Þór Þórðarson.

Afgangurinn, eða 28,3% aðspurðra, skilaði hins vegar auðu, ef svo má að orði komast um skoðanakönnun.

Til samanburðar nefndu 51,4% aðspurðra sjálfstæðismanna nafn Hönnu Birnu en 24,3% nafn Bjarna Benediktssonar.

Alls voru 1.320 í úrtaki og var svarhlutfall um 60%. Tóku þar af 80% afstöðu.

Könnunin var gerð á netinu 7.-14. júlí í sumar.

Hafa úrslitin verið kunngerð forystu Sjálfstæðisflokksins, að því er fram kom í fréttum Stöðvar 2 í kvöld.

En eins og tekið var fram í kvöldfréttum Stöðvar 2 hefur fylgi Sjálfstæðisflokksins síðan aukist í könnunum og staða Bjarna sem formanns því ef til vill styrkst.