Ljóst er að þeir sem tóku gengistryggð lán og greiddu þau upp muni fá endurgreidda tugi milljarða króna en mikil óvissa ríkir um það hve víðtæk áhrifin af vaxtadómi Hæstaréttar í gær verða.

Bankastjóri Landsbankans, Steinþór Pálsson, segir að ljóst sé að endurreikna verði öll gengislán bankans í kjölfar dómsins. Fram kom í yfirlýsingu frá Íslandsbanka í gær að hann myndi fara vandlega yfir dóm Hæstaréttar og meta áhrif hans en engin gengistryggð lán væru í tryggingasafni sértryggðra skuldabréfa bankans. Miðað við þá túlkun dómsins, sem talin væri bankanum mest í óhag, þá verði eiginfjárhlutfall áfram yfir þeim lágmörkum sem FME setur.

Arion banki sagði í yfirlýsingu að ekki lægi fyrir hvert fordæmisgildi dómsins yrði gagnvart þeim gengistryggðu lánum sem Arion banki hefur endurreiknað. En fjárhagur bankans yrði eftir sem áður mjög traustur.

Í umfjöllun um dóminn og afleiðingar hans í Morgunblaðinu í dag segir Gunnar Andersen, yfirmaður Fjármálaeftirlitsins, að bankarnir eigi vel að geta ráðið við afleiðingar dómsins. Hann bætir við að hann telji þetta ekki vera neitt sem ógni fjármálastöðugleika í landinu.

Bankarnir munu ekki eiga endurkröfurétt á hendur þrotabúum gömlu bankanna, frestur til kröfulýsinga er fyrndur. Þegar ríkisstjórnin samdi við erlenda kröfuhafa um að þeir yfirtækju þrotabúin var ekki settur fyrirvari um að semja mætti á ný ef dómar yrðu til að breyta forsendum.

Tengdar fréttir

Dómur Hæstaréttar um gengislán

Lýsing endurreiknar í kjölfar dóma

• Lýsing tapaði þremur málum í héraði
• Íhuga sektir vegna tafa
• Færri prófmál en boðað var
• Ofmeti ekki gengisdóma

» Fleiri tengdar fréttir