Enginn handtekinn vegna líkamsárásar

Enginn hefur verið handtekinn í tengslum við líkamsárás á ungan mann í Skútuhrauni í Hafnarfirði aðfaranótt laugardagsins síðasta.

Að sögn Friðriks Smára Björgvinssonar, yfirlögregluþjóns hjá lögreglunni á höfuðborgarsvæðinu, er rannsóknin enn í gangi en drengnum var troðið ofan í skott á bifreið sem var ekið að Mjóddinni í Reykjavík. Hann kom sér sjálfur á slysadeild og var handleggs- og fótbrotinn, ásamt öðrum áverkum. Aðspurður vill Friðrik Smári ekki gefa upp hvort málið tengist fíkniefnum.

Þá er rannsókn einnig í gangi á eldi í íbúðarhúsi við Hverfisgötu í Hafnarfirði á mánudagskvöldið en hann kviknaði eftir að molotovkokkteil var varpað að húsinu. „Hún er í gangi en það er óvíst hvernig henni mun vinda fram,“ segir Friðrik Smári. „Það hefur enginn verið handtekinn og enginn yfirheyrður sem grunaður.“

• 1 blogg um fréttina

Bloggað um fréttina

• Börkur Hrólfsson: Engin furða !