Tignarleg sjón blasti við þeim sem leið áttu um miðbæinn í hádeginu í dag, en þar fór fram skrúðreið 150 knapa og hesta sem lögðu af stað frá Tanngarði og riðu síðan í gegnum miðbæinn og enduðu í Hljómskálagarðinum.
Lögreglumenn í fullum skrúða og knapar í þjóðbúningi settu svip sinn á reiðina, en nú standa yfir Hestadagar í Reykjavík undir yfirskriftinni „Hneggjandi skemmtilegt gaman“.
Í dag verður viðamikil dagskrá í tilefni Hestadaganna og lýkur henni á ístölti í Skautahöllinni í Laugardal.
Ungviðið var ekki skilið útundan, en börnin fengu að bregða sér á bak við Ráðhús Reykjavíkur undir vökulu auga hestamanna.