Einstök hljómhviða í Laugardalnum

„Takturinn talar til okkar, hann er eitthvað sem við þurfum á að halda," segir Karl Ágúst Úlfsson, sem situr nú við innganginn að Laugardalslaug og ber taktinn á um 100 vatnsdunkum. Gjörninginn kallar hann taktsamfélag, sem hann býður gestum Laugardalslaugar að taka þátt í.

„Það sameinar fólk að slá taktinn saman, trommuhringurinn sem ég er nokkurs konar fulltrúi fyrir gengur út á það að hver og einn sem kemur inn í hringinn á sinn eigin takt og gerist um leið félagi í samfélagi sem getur varað í nokkrar mínútur eða klukkustund, eftir því hverju fólk nennir," segir Karl Ágúst. 

Tilefni taktsamfélagsins er lokahátíð Barnamenningarhátíðar, sem fram fer í Laugardalslaug í dag og hefst klukkan 14. Karl Ágúst segir að margir hafi gengið á taktinn og slegið nokkur slög, en fólk mætti gjarnan staldra við lengur. „Þegar hver og einn leggur til sinn takt verður til einstök hljómhviða sem aldrei verður endurtekin."

• 2 blogg um fréttina

Bloggað um fréttina

• Ómar Ragnarsson: Hljómkviðan skemmtileg hugmynd.
• Guðni Karl Harðarson: Er ekki hægt að vera með á netinu?