Búið að slá 23 milljónir af húsinu

Búið er að lækka verð á Sunnuflöt 48 í Garðabæ, en það er eitt stærsta einbýlishús landsins. Húsið er núna auglýst á 69,8 milljónir en var auglýst á 93 milljónir í nóvember þegar það var fyrst auglýst til sölu. Það er því búið að lækka verðið um 23,2 milljónir. Húsið er í eigu Landsbankans.

Sagt var frá húsinu á mbl.is þegar það kom fyrst í sölu. Fasteignasali sem mbl.is ræddi við í dag segir að húsið sé erfitt í sölu. Það sé stórt og kosti mikla peninga að klára það. Hópurinn sem geti keypt svona stóra eign sé ekki stór.

Á fasteignavef mbl.is kemur fram að húsið er 932 fm, en þar af er bílskúr 63 fm. Húsið, sem er á fallegum stað innst í botnlanga við Sunnuflöt í Garðabæ, er tvær hæðir og hannað af Gassa arkitektum. Húsið stendur á um 1590 fm lóð. Lóðin er afgirt með steyptri girðingu.

Búið er að steypa húsið upp og loka því til bráðabirgða. Eftir er að setja glugga í það. Talið er að það geti kostað 150-250 milljónir að klára húsið.

Samkvæmt teikningum er gert ráð fyrir á efri hæðinni anddyri, gestasalerni, forrými, eldhúsi, borðstofu, stofu með arni, sjónvarpsstofu, hjónaherbergi með baðherbergi, fataherbergi, baðherbergi, tveimur herbergjum, skrifstofu, þvottaherbergi og bílskúr.

Neðri hæð skiptist í: Herbergi, fataherbergi, baðherbergi, tómstundaherbergi, vínkjallara, forrými, lagnarými, fitness, baðrými með sundlaug og heitum potti, búningsherbergi með salerni, sturtum, köldum potti og gufubaði.

Ekki fengust upplýsingar um hversu mikla fjármuni er búið að leggja í byggingu hússins nú þegar, en þó er ljóst að það er langtum meira en þær tæplega 70 milljónir sem Landsbankinn vill fá fyrir húsið.