Þrjár björgunarsveitir Slysavarnafélagsins Landsbjargar á höfuðborgarsvæðinu voru kallaðar út um klukkan fimm í dag til aðstoðar ferðamönnum sem voru í vandræðum á Mosfellsheiði.
Aðstoðarbeiðnir höfðu borist frá nokkrum ferðamönnum en þegar upp var staðið voru um 10 - 15 bílar í vandræðum ásamt rútu með um tuttugu ferðamenn. Alls voru því hátt í 40 ferðamenn aðstoðaðir til byggða. Í öllum tilfellum voru bifreiðar ferðamanna skildir eftir. Rétt í þessu er aðgerðum að ljúka og eru björgunarsveitarmenn á leið með ferðamenn á gististaði hér og þar á höfuðborgarsvæðinu.
Ekkert ferðaveður er á Mosfellsheiði frekar en víða annars staðar á heiðarvegum og ættu ferðalangar að kynna sér vel aðstæður áður en lagt er í hann núna um jólahátíðarnar, segir í tilkynningu frá Slysavarnafélaginu Landsbjörgu.
Færð er farin að spillast í kringum höfuðborgarsvæðið. Töluverð ófærð er á Mosfellsheiði og er hún lokuð. Vegfarendur eru beðnir um að virða lokanir og kynna sér vel ástand vega áður en haldið er af stað, samkvæmt upplýsingum frá Almannavörnum.