Á höttunum eftir Íslendingum

Veruleg eftirspurn er um þessar mundir eftir flugmönnum, flugfreyjum og flugþjónum og flugvirkjum af hálfu flugfélaga bæði hér á landi og erlendis.

Samkvæmt upplýsingum Keilis hefur fjöldi kennara og starfsmanna Flugakademíunnar verið ráðinn til starfa við flugfélög bæði á Íslandi og erlendis. Þá hafa fjölmargir útskrifaðir nemendur úr atvinnuflugmannsnámi verið ráðnir til starfa sem flugmenn á seinustu misserum.

Í umfjöllun um mál þetta í Morgunblaðinu í dag kemur meðal annars fram, að Flugfélagið Qatar Airways hefur á seinustu dögum birt auglýsingar á Íslandi þar sem leitað er að íslenskum flugfreyjum og flugþjónum til starfa í flugvélum félagsins en móttaka umsókna verður 25. janúar.