Gagnrýna meirihlutann í húsnæðismálum

Fulltrúar Sjálfstæðisflokksins í borgarstjórn Reykjavíkur gagnrýndu meirihlutann á fundi í dag fyrir litla uppbyggingu í húsnæðismálum á kjörtímabilinu. 

Hópurinn stækkar og íbúðum fjölgar ekki nóg

Í ræðu sinni gagnrýndi Áslaug María Friðriksdóttir borgarfulltrúi drögin að nýrri eignastefnu félagsíbúða. Áhersla félagsins muni breytast í þá átt að fleiri munu falla undir viðmið velferðarsviðs Reykjavíkurborgar um aðstoð. Segir hún að áætlað sé að með því bætist 3.000 manns í þann hóp sem nýtt gæti úrræði Félagsbústaða. Áætluð fjölgun íbúða er hins vegar langt frá því að geta sinnt þeirri þörf. Telur hún að í stað þess að stækka viðskiptavinahóp Félagsbústaða ætti borgarstjórn að skoða hvernig beita mætti almennum hvötum til að koma uppbyggingu hraðar af stað.
<!--[endif]-->

„Eins og allir vita er þörf fyrir húsnæði gríðarlega mikil, 850 bíða eftir félagslegu húsnæði, 250 eftir þjónustuíbúðum. Uppbygging á þessu kjörtímabili hefur nánast verið engin en aðeins hefur fjölgað um 75 íbúðir Félagsbústaða á tímabilinu.“ sagði Áslaug.
<!--[endif]-->

Vilja almennar aðgerðir til lækkunar húsnæðisverðs

Kjartan Magnússon borgarfulltrúi sagði í ræðu sinni að rekja mætti húsnæðisskortinn nokkur ár aftur í tímann, nánar tiltekið til áranna 2000-2006. „Á því tímabili var húsnæðisverð í borginni markvisst hækkað og húsnæðisbóla búin til með mikilli takmörkun lóðaframboðs og síðan uppboðs á lóðum. Slíkt leiddi til þess að fjölskyldur neyddust til að kaupa lóðir á uppsprengdu verði og síðar kom í ljós að margar þeirra stóðu ekki undir því. Samfylkingin hafði mikla forystu í þessari óheillavænlegu stefnumótun og ber þannig mikla ábyrgð á hinu háa húsnæðisverði sem margar reykvískar fjölskyldur, og þá einkum ungt fólk, glíma við í dag,“ segir Kjartan. 

Telur Kjartan að nú sé sami flokkur og sömu borgarfulltrúar og framkölluðu okurverð á lóðum með miðstýringu að koma til bjargar með nýjar miðstýrðar patentlausnir. 

„Borgarfulltrúar Sjálfstæðisflokksins styðja öll góð áform í húsnæðismálum en benda á að best sé að ná saman um almennar aðgerðir til lækkunar húsnæðisverðs enda sé líklegt að slíkar leiðir nýtist flestum,“ sagði Kjartan að lokum. 

Áslaug Friðriksdóttir og Kjartan Magnússon

• Blogga um frétt