Hæstiréttur hefur staðfest þriggja ára fangelsisdóm sem Daði Freyr Kristjánsson hlaut í Héraðsdómi Reykjavíkur í október sl. fyrir frelsissviptingu og kynferðisbrot gagnvart tveimur sjö ára stúlkum.
Daði var ákærður fyrir sifskapar- og frelsissviptingarbrot með því að hafa þann 9. janúar 2013 sagt tveimur sjö ára stúlkum að fara inn í bifreið sína við strætóskýli í Árbæ og ekið með þær á afvikinn stað sunnan við hús Morgunblaðsins í Hádegismóum en hleypt þeim síðan út á sama stað og hann sótti þær.
Þá var hann einnig ákærður fyrir kynferðisbrot með því að hafa, meðan á framangreindri frelsissviptingu stóð, kysst aðra stúlkuna á kinnina og snert maga og læri þeirra utan klæða.
Daði Freyr játaði brot sitt skýlaust og gaf sig fram við lögreglu þegar lýst var eftir honum.
Daði var fundinn sekur um brot gegn 193. gr., 2. mgr. 202. gr. og 1. mgr. 226. gr. almennra hegningarlaga nr. 19/1940. Hann var því dæmdur í þriggja ára fangelsi og til að greiða hvorri stúlknanna 800.000 krónur í miskabætur auk vaxta, að því er segir í dómi Hæstaréttar.
Daði gaf sig fram við lögreglu og játaði sök fyrir héraðsdómi þar sem hann gekkst greiðlega við brotum sínum.