„Við erum að dæla núna alveg spriklandi draumamakríl,“ sagði Jón Axelsson, skipstjóri á Álsey VE-2, um miðjan dag í gær. Skipið var þá að veiðum um 70 sjómílur suðaustur af Vestmannaeyjum.
Rjómablíða var á miðunum og sagði Jón að þeir hefðu séð mikið af vaðandi makríl á Kötlugrunni í fyrrinótt. Landa átti makrílnum til vinnslu í Vestmannaeyjum í dag.
Jóel Þórðarson, skipstjóri á frystitogaranum Guðmundi í Nesi RE-13, sagði að makríllinn væri mun fyrr á ferðinni nú en í fyrra. Þeir væru að fá fínasta fisk miðað við árstíma, makríllinn hefði verið lakari á sama tíma í fyrra.