Sala erlendra dótturfélaga Norvik, undir merkjum Norvik Timber Industries, hefur aukist um 15-17% á árinu og stefnir í að vera um 180 milljónir evra í ár, eða sem svarar 28 milljörðum króna. Það er mesta sala félagsins á timbri á einu ári frá stofnun þess um aldamótin.
Aukningin í timbursölu Norvik í ár er 3,7-4 milljarðar króna milli ára. Í umfjöllun um þessa starsfemi í Morgunblaðinu í dag segir Jón Helgi Guðmundsson, forstjóri og stjórnarformaður Norvik, framleiðsluna hafa aukist á árinu og að áform séu um að auka hana frekar á næstu misserum.
Félagið keypti og tók niður sögunarmyllu á vesturströnd Noregs í hittifyrra og flutti hana með bílum og járnbrautarlest til Syktyvkar, höfuðborgar rússneska lýðveldisins Komi, þar sem hún kom í stað eldri verksmiðju. Með því jukust afköstin úr 15-20 þúsund rúmmetrum á ári í 50 þúsund rúmmetra á ári á einni vakt í sögunarverksmiðjunni. Eru uppi áform um að bæta við vakt.