Maðurinn sem ráðist var á aðfaranótt fimmtudagsins 17. júlí sl. í Grundarfirði verður útskrifaður af gjörgæsludeild Landspítala í dag. Honum var haldið sofandi en hefur nú verið vakinn, að sögn vakthafandi læknis.
Maðurinn hlaut alvarlega höfuðáverka og slasaðist alvarlega þegar tveir menn ráðust á hann á bryggju í Grundarfirði. Á myndbandi sem tekið var með eftirlitsmyndavél við höfnina sést meðal annars að annar árásarmaðurinn veitt fórnarlambinu högg sem leiddi til þess að maðurinn féll á bryggjuna.
Hinn árásarmaðurinn settist þá klofvega yfir þann sem varð fyrir högginu, þar sem hann lá óvígur og hreyfingarlaus, og veitti honum tvö högg með hægri hendi.
Þeir hættu ekki fyrr en þriðji aðili kom frá bátnum, sem þeir höfðu komið frá, og kallaði mennina til sín. Þegar lögregla kom á vettvang var stór blóðpollur á jörðinni þar sem höfuð mannsins hafði legið.
Hæstiréttur staðfesti á mánudag fjögurra vikna gæsluvarðhald yfir árásarmönnunum tveimur.
Frétt mbl.is: Settist klofvega yfir óvígan og kýldi.
Frétt mbl.is: Í haldi vegna rannsóknarhagsmuna.