Stefnt er að því að vísindamenn fljúgi næst yfir Holuhraun á sunnudag en síðast var flogið yfir gosstöðina fyrir hádegi í dag. Einnig er nokkrir vísindamenn að störfum á svæðinu, safna sýnum og setja upp mælitæki.
Verið er að senda fyrstu sýnin frá svæðinu og verða þau efnagreind í nótt. Að sögn Víðis Reynissonar, deildarstjóra Almannavarna, verða sýnin greind til að kanna hvaðan kvikan kemur.
Mat vísindamanna sem flugu yfir svæðið í morgun er að gosið liggi alveg niðri og virðist gosið jafnvel vera búið. Taki gosið sig upp á ný, flokkast það sem nýr atburður og þar af leiðandi nýtt gos. Vísindamennirnir fara út af hættusvæðinu í kvöld.
mbl.is ræddi við Magnús Tuma Guðmundsson, jarðeðlisfræðing, eftir að hann kom úr flugi með TF-SIF yfir gosstöðina í morgun. Hann sagði gosið í nótt hafa verið margfalt minna en það sem var í Bárðarbungu líklega í síðustu viku.