Hæstiréttur hefur sýknað Þorvald Gylfason, hagfræðiprófessor, af kröfum Jóns Steinars Gunnlaugssonar, fyrrverandi hæstaréttardómara. Málið var höfðað vegna skrifa Þorvaldar um orðróm þess efnis að Jón Steinar hafi lagt drög að kæru til Hæstaréttar sem síðar hafi verið notuð sem átylla til að ógilda stjórnlagaþingskosningarnar.
Hæstiréttur segir að Þorvaldur hefði ekki farið út fyrir mörk leyfilegrar tjáningar og staðfesti því dóm Héraðsdóms Reykjavíkur sem féll 11. febrúar sl.
Málið var höfðað vegna skrifa Þorvaldar um orðróm þess efnis að Jón Steinar hafi lagt drög að kæru til Hæstaréttar sem síðar hafi verið notuð sem átylla til að ógilda stjórnlagaþingskosningarnar.
Jón Steinar fór fram á að ummælin yrðu dæmd dauð og ómerk, Þorvaldi gerð refsing, hann dæmdur til að greiða sér 2,5 milljónir króna í miskabætur og hálfa milljón til að kosta birtingu niðurstöðu dómsins í tveimur dagblöðum. Þá krafðist hann að sér yrði dæmdur málskostnaður að skaðlausu.
Greinina sem bar heitið From Collapse to Constitution: The Case of Iceland ritaði Þorvaldur í ritröð háskólans í München í Þýskalandi og var hún birt í mars 2012.
Héraðsdómur Reykjavíkur sýknaði Þorvald af kröfum Jóns Steinars og sagði í niðurstöðu dómsins að í orðum Þorvaldar Gylfasonar,hagfræðiprófessors, hafi ekki falist fullyrðing um að Jón Steinar hefði skrifað eina af kærunum til Hæstaréttar vegna stjórnlagaþingskosninganna og síðan úrskurðað um hana. Þorvaldur segi hins vegar að orðrómur sé á kreiki um að svo hafi verið, en að það sé ósannað.
Frétt mbl.is: Frásögn af orðrómi ekki fullyrðing um atvik
Frétt mbl.is: Þorvaldur sýknaður af kröfum Jóns Steinars
Frétt mbl.is: Sannleikskorn eða sandkorn DV